Er gott að hafa með sér slopp, inniskó, rakáhöld, tannbursta, tannkrem, greiðu og eða aðrar snyrtivörur sem eru nauðsynlegar. Náttföt, nærföt og léttan klæðnað til að vera í á daginn sé viðkomandi ekki rúmfastur. Þegar íbúar flytja inn í hjúkrunarrými er nauðsynlegt að merkja fatnað, veita upplýsingar um hagi íbúa svo sem fjármál, fjölskyldumál og annað er þykir nauðsynlegt. Hjúkrunarheimilið ber ekki ábyrgð á viðkvæmum fatnaði og eða teppum. Slíkt þurfa aðstandendur að sjá um að sé þvegið.

Lyf og lyfjakort skal afhenda hjúkrunarfræðingi sem færir það yfir í lyfjaskömmtun hjá heimilinu. Læknir heimilisins hefur yfir umsjá með lyfjameðferð.

Heimilisfólki er heimilt að reykja í bakgarði heimilisins. Samkvæmt lögum er gestum og starfsfólki með öllu óheimilt að reykja innandyra eða á lóð stofnunarinnar. 

Deildin getur ekki ábyrgst fjármuni né verðmæti sem fólk kemur með. Viðkomandi eru hvattir til að koma sér upp peningaskáp inn í sinni íbúð eða geyma hjá aðstandendum.

Sameiginleg setustofa og borðstofa er nýtt sem aðstaða til þjálfunar, afþreyingar og samveru.  Einnig til hópastarfs tengdu félagsstarfi og fyrir uppákomur af ýmsu tagi, tónlistarflutning og ýmiss konar annað félagslegt.

Góð aðstaða er til útiveru á Seltjörn. Upphitaður göngustígur er umhverfis heimilið og ýmis setusvæði. Í garðinum eru bekkir og borð sem nýtt eru á góðviðrisdögum. Heimilisfólk getur farið þar um og notið gróðurs og fallegs útsýnis. Einnig er hægt að fara upp á þak hússins og er þaðan einstakt útsýni yfir nesið og Esjuna.